মনোপুব্বঙ্গমা ধম্মা    মনোসেট্‌ঠা মনোময়া।

মনসা চে পদুট্‌ঠেন    ভাসতি বা করোতি বা।

ততো নং দুক্‌খমন্বেতি    চক্কং ব বহতো পদং॥ ১

মনোপুব্বঙ্গমা ধম্মা    মনোসেট্‌ঠা মনোময়া।

মনসা চে পসন্নেন    ভাসতি বা করোতি বা।

ততো নং সুখমন্বেতি    ছায়া ব অনপায়িনী॥ ২

অক্কোচ্ছি মং অবধি মং    অজিনি মং অহাসি মে।

যে চ তং উপনয্‌হন্তি    বেরং তেসং ন সম্মতি॥ ৩

অক্কোচ্ছি মং অবধি মং    অজিনি মং অহাসি মে।

যে চ তং নূপনয্‌হন্তি    বেরং তেসূপসম্মতি॥ ৪

নহি বেরেন বেরানি    সম্মন্তীধ কুদাচনং।

অবেরেন চ সম্মন্তি    এস ধম্মো সনন্তনো॥ ৫

পরে চ ন বিজানন্তি    ময়মেত্থ যমামসে।

যে চ তত্থ বিজানন্তি    ততো সম্মন্তি মেধগা॥ ৬

সুভানুপস্‌সিং বিহরন্তং    ইন্দ্রিয়েসু অসংবুতং।

ভোজনম্‌হি অমত্তঞ্‌ঞুং   কুসীতং হীনবীরিয়ং।

তং বে পসহতি মারো    বাতো রুক্‌খং ব দুব্বলং ॥ ৭

অসুভানুপস্‌সিং বিহরন্তং    ইন্দ্রিয়েসু সুসংবুতং।

ভোজনম্‌হি চ মত্তঞ্‌ঞুং    সদ্ধং আরব্ধবীরিয়ং ।

তং বে নপ্পসহতি মারো    বাতো সেলং ব পব্বতং॥ ৮